Бүгінгі күні аудан бойынша ауыл шаруашылығы саласында 27 заңды тұлға, 594 шаруа қожалықтары - барлығы 621 ауылшаруашылық құрылымдары тіркелген.
Аудан бойынша 2017 жылы ауыл шаруашылығы өнімдерінің жалпы шығарылымы 14181,1 млн теңге болып, өткен кезеңмен салыстырғанда 102,5 % ұлғайды немесе облыстың ауыл шаруашылығы өнімінің (қызметтерінің) көлеміндегі үлес салмағы 9,9% құрап отыр.
2018 жылдың 1 қаңтарына дейінгі жағдайға аудан бойынша шаруашылықтардың барлық санаттарындағы мал санының (түйеден басқа) өсімі байқалады (Ірі қара малы 75940 басты құрайды, яғни өткен кезеңмен салыстырғанда 109,6%, қой мен ешкі – 227008 басқа жетіп, тиісінше 103,5%, жылқы – 22525 бас (113,0%), түйе – 184 бас (93,4%) және құс 14815 бас (103,7%) өсті.
Өткен жылы 11966 тонна ет (тірілей салмақта), 25264 тонна сүт, 336 тонна жүн, 2717 мың дана жұмыртқа өндіріліп, 2016 жылғы деңгеймен салыстырғанда ауылшаруашылық өнімдерінің барлық түрлері бойынша өсімі қамтамасыз жасалды (ет – 102,0%, сүт – 103,4%, жүн – 107,4%, жұмыртқа – 101,1%).
Төрт түлік малдан төл алу көрсеткіштері бойынша да өсім бар, атап айтқанда 27406 бас бұзау, 134363 бас қозы-лақ, 6620 құлын, 19 бас бота алынып, өсім тиісінше бұзау – 107,3%, қозы-лақ – 105,3%, құлын – 112,8%, бота – 105,6% құрады.
Ауылдық округтер бойынша мал шаруашылығының даму көрсеткіштеріне жүргізілген талдау өткен кезеңмен салыстырғанда Қайыңды (түйе), Болашақ (ірі қара, түйе), Казталов (ірі қара), Бостандық (ұсақ қара, түйе),Қараоба (түйе), Бірік (ірі қара, түйе), Жаңажол (ұсақ қара), Қарасу (түйе), Қараөзен (түйе), Жалпақтал (төрт түліктен де) ауылдық округтері бойынша мал басы санының азайғанын көрсетті.
Қазіргі уақытта ауыл шаруашылығының кооперациясын дамыту мәселелеріне баса мән берілуде. Өткен жылы аудан бойынша есепте тұрған 22 ауыл шаруашылығы кооперативтерінің құрамына 1437 тұрғын мүшелікке енген, онда 11798 бас ірі мүйізді қара, 2160 бас қой тіркелген.
Бұл жаңа құрылым өзінің тиімділігін көрсетіп, мал бағымының өз деңгейінде ұйымдастырылуына, мал ұрлығының шектелуіне және мал өнімдері сапасының артуына септігін тигізуде. Өткен жылы аудан бойынша осы ауылшаруашылық құрылымдарына 133 млн 218 мың теңгеге мемлекеттік қолдау көрсетілді.
Бүгінде ауданда асыл тұқымды ірі қара малын өсірумен 9 шаруашылық (1569 бас), қой өсірумен 4 шаруашылық (4319 бас) және жылқы өсірумен 3 шаруашылық (1240 бас) айналысып, өз өнімдерін саттық ұсынуда.
2015 жылдан бері Ақпәтер ауылдық округіне қарасты «Перизат», «Қамқор» шаруа қожалықтары асыл тұқымды қой өсірумен айналысып, ауданның ауылшаруашылық құрылымдарына 590 бас асыл тұқымды «Еділбай» қошқарының сатылуын қамтамасыз жасады. Өткен жылы осы ауылдық округтегі «Бейназар-Б» шаруа қожалығы 240 бас, Көктерек ауылдық округіне қарасты «Ақжол» шаруа қожалығы 402 бас асыл тұқымды «Еділбай» қойын сатып алып, асыл тұқымды қой өсірумен шұғылдануда.
Жылқы шаруашылығын дамыту жобасы бойынша Болашақ ауылдық округіне қарасты «Жаңа тұрмыс» өндірістік кооперативінде, Ақпәтер ауылдық округіне қарасты «Қамқор», «Бейназар-Б» шаруа қожалықтарында асыл тұқымды «Көшім» жылқысы өсірілуде.
Аудан шаруашылықтары өткен жылы асыл тұқымды 443 бас өндіргіш бұқа, 1864 бас қой, 22 бас айғыр сатып алынуын қамтамасыз жасады. Үстіміздегі жылы Жаңажол ауылдық округіне қарасты «Райынбек» шаруа қожалығы өз қаражатына етті бағыттағы асыл тұқымды «Ангус» тұқымының 55 бас аналығы мен 2 бас өндіргіш-бұқасын сатып алып, асыл тұқымды мал өсіруді қолға алып отыр.
Мемлекеттік бағдарлама аясында «Ірі қара малы етінің экспорттық әлеуетін дамыту» бағытын орындау мақсатында Ақпәтер ауылдық округіне қарасты «Қамқор», «Асхат» шаруа қожалықтарында мал бордақылау алаңдары жұмыс жасауда. Биылғы жылы да бұл бағыттағы жұмыс жалғастырылып, Қошанкөл ауылдық округіне қарасты «Ажкей», Қараоба ауылдық округіне қарасты «Ақбота» шаруа қожалықтарында мал бордақылау алаңдарын іске қосу жоспарлануда.
Мал шаруашылығын дамыту бағытында қабылданған бағдарламаларға қатысушылар саны 2012 жылы 49 шаруашылықты құраған болса, бүгінгі күні бағдарлама игілігін пайдаланатын шаруашылықтар саны 6 есеге жуық артып отыр. Ауданның ауылшаруашылық тауарын өндірушілері соңғы 5 жылдың ішінде бағдарламаның 11 бағыты бойынша 2 млрд 384 млн теңге мөлшеріндегі демеуқаржыға ие болды. Өткен жылы аудан бойынша 290 шаруашылық 612 млн теңге көлеміндегі қаражатқа мемлекет тарапынан субсидияланды.
«Сыбаға» бағдарламасы бойынша 2017 жылы 9 шаруа қожалығы 101 млн 985 мың теңге, «Алтын асық» бағдарламасы бойынша 1 шаруашылық 400 млн теңге, «Құлан» бағдарламасы бойынша 3 шаруа қожалығы 37 млн 90 мың теңге несие алуға қол жеткізді. Аталған бағдарламалар шеңберінде 13 ауылшаруашылық тауарын өндірушілерге берілген 149 млн 135 мың теңге қаражатқа 16 бас өндіргіш бұқа, 492 бас қашар, 400 бас саулық қой, 3 бас айғыр, 93 бас байтал сатып алынды.
Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған салалық бағдарламасына сәйкес ауыл тұрғындарын
жұмыспен қамтамасыз ету және жеке қосалқы шаруашылықтардың әлеуетін пайдалану арқылы агроөнеркәсіп кешені өнімдері өндірісінің көлемін арттыру және азық-түлік қауіпсіздігі мәселелерін шешу жөніндегі іс-шаралар жоспарын іске асыру мақсатында «Береке» несиелік бағдарламасы аясында мүйізді ірі қара малын бордақылаумен айналысатын 2016 жылы – 2, 2017 жылы - 3 ауылшаруашылық өндірістік кооперативтері құрылып жұмыс істеуде.
Есепті мерзім ішінде аталған несиелік бағдарлама шеңберінде 49 отбасылық мал бордақылау алаңдары ұйымдастырылып, 156 млн 600 мың теңге несиелік қаражатқа 858 бас бұқашық сатып алынды. Сонымен қатар, өзін-өзі қамтушы 11 жеке тұлға қайтарымды қаражаттар есебінен алған 27 млн 170 мың теңге несиеге 116 бас ірі қара малын сатып алып, өз істерін ашуға мүмкіндік алды.
Өткен жылы аудан бойынша «Игілік» несиелік бағдарламасы шеңберінде 22 жеке тұлға 92 млн 200 мың теңге несие алуға қол жеткізіп, малдану мақсатында 298 бас ірі малын сатып алды.
Аудан аумағындағы халқы тығыз қоныстанған елді мекендерде мал сою орындарын ашу мақсатында Жалпақтал ауылдық округіне қарасты «Жалпақтал» ауылшаруашылық өндірістік кооперативі (төрағасы – Д.Догоров) «Ауыл шаруашылық қаржылай қолдау қоры» АҚ Батыс Қазақстан облыстық филиалы арқылы «Ынтымақ» бағдарламасы бойынша 19 млн 700 мың теңге несие алып, қысқа мерзімде нысанның пайдалануға берілін қамтамасыз жасаса, Казталов ауылдық округіне қарасты «Шығанақ» ауылшаруашылық өндірістік кооперативі (төрағасы – Ж.Аксалов) өз қаражаты есебінен 20 млн теңгеге тиісті санитарлық талаптарға сәйкес келетін мал сою алаңының құрылысын жүргізуде.
Сонымен қатар, «Қанат» бағдарламасы бойынша 8 шаруа қожалығы 40 млн 626 мың теңгеге 6 дана МТЗ тракторын, 1 дана Камаз жүк автокөлігін және 4 дана түрлі ауылшаруашылық құрал-жабдықтарын сатып алды.«Іскер» бағдарламасы бойынша 17 шаруа қожалығы 78 млн 700 мың теңгеге 403 бас ірі қара малын сатып алып, 14 жаңа жұмыс орындарының ашылуы қамтамасыз жасалды. «Бірлік» бағдарламасы бойынша 6 шаруа қожалығы 35 млн 680 мың теңге несиелік қаражаттарға қол жеткізді. Бұл ауылшаруашылық тауарын өндірушілерінің өздерінің айналым қаражаттарын толықтырып, кәсіпкерлік қызметін кеңейтуге үлкен септігін тигізді.
Ауыл шаруашылығы техникаларын жаңғырту мақсатында өткен жылдың өзінде ғана аудан бойынша 38 дана ауылшаруашылық техникалары, соның ішінде лизинг арқылы 72 млн 430 мың теңгеге 12 шаруа қожалығы бойынша 12 дана трактор сатып алынды.
Жаңа технологияларды өндіріске енгізу мақсатында ауданның 16 шаруашылық қыстақтарында күн сәулесі және жел арқылы жарық беретін қондырғылар орнатылса, биылғы жылы жайылымдарды суландыру инфрақұрылымын құру және мал өсіруші шаруашылықтарды сумен қамтамасыз ету жобасы бойынша 13 құбырлы құдық қазылды, сондай-ақ 13 шаруа қожалығы өз қаражаттарына жаңа жобамен ангарлы мал қорасын салғызып алды.
Агроөнеркәсіптік кешен субъектісі көтерген шығыстар бөлігін өтеу бағыты бойынша 360 млн 471 мың теңге көлеміндегі инвестициялық жобаға 78 шаруашылық өтінім тапсырып, 167 млн 127 мың теңге демеуқаржыға ие болды, яғни жұмсалған шығынның 46,4 пайызы мемлекет есебінен өтелді.
Жалпы алғанда, ауданның ауылшаруашылық тауарын өндірушілері өткен жылы мемлекеттік бағдарламаларға белсене қатысу арқылы 1 млрд 432 млн теңге несиелік қаражаттар мен демеуқаржыларға қол жеткізді. Бұл өз ісін ашу және кеңейту бағытында жұмыс жасап жатқан ауылдағы ағайынға мемлекет тарапынан көрсетілген үлкен көмек деп білеміз.
Ауылдық округтерде жеке тұрғындардың ірі қара малын қолдан ұрықтандыру мақсатында 7 қосын жұмыс істейді. Өткен жылы жеке қосалқы шаруашылықтардағы 828 бас аналық мал қолдан ұрықтандырылып, 2 млн 827 мың теңге субсидия төленді. Сондай-ақ, қоғамдық табындарда 48 бас асыл тұқымды өндіргіш-бұқалар пайдаланылып, жеке тұрғындардың 1440 бас мүйізді ірі қара малын асылдандыру жұмыстары жүргізілді.
Өсімдік шаруашылығы бойынша өткен жылы картоп, көкөніс-бақша дақылдары 169 га жерге орналастырылды, соның ішінде картоп 22 га, көкөніс 92 га және бақша дақылдары 55 га, сондай-ақ, көпжылдық екпелі шөп (еркекшөп) алқабы 250 га құрайды. Осы алқаптардан 231 тонна картоп, 1080 тонна көкөніс, 770 тонна бақша өнімдері алынды, 2016 жылмен салыстырғанда өнім тиісінше картоптан – 192,5%, көкөніс – 179,4% және бақша - 225,1% артты.
Мал азығының берік қорын жасақтамай, мал басының өсімі мен өнімділігін арттыруға қол жеткізу мүмкін еместігі мал баққан барша ағайынға аян.
Аудан шаруашылықтары биылғы жылы мал азығының берік қорын жасақтау мақсатында 228 мың тонна көлеміндегі табиғи мал азығын дайындау жоспарын 234 мың тоннаға немесе 102,6% орындады. Шабындықтардың әр гектарынан орта есеппен 6,6 центнер өнім алынды. Мал азығын дайындау науқанына 326 трактор, 500 орақ қатысты.
Аудан аумағындағы көлдетіп және жүйелі суармалы жер көлемі 68411 га құрайды, соның ішінде 22157 га жер су реттегіш имараттар арқылы, мысалы «Сакрыл» суландыру жүйесі бойынша 14901 га, «Мамай» суландыру жүйесі бойынша 1967 га жер суландырылады. Қазіргі аталған суландыру жүйелерін республикалық меншікке, яғни «ҚазСуШар» АҚ филиалының теңгеріміне алу бағытындағы жұмыстар жүргізілуде.
Өткен жылы Талдыапан ауылдық округіне қарасты «Баубек» суландыру жүйесіне, «Тоғыз», «Әжімбет», «Лиман 55», «Дюрин-Балықты» және Көктерек ауылдық округіне қарасты «Балықты» суландыру каналдарына жерге орналастыру актілері және техникалық құжаттары жасақталды.
Батыс Қазақстан облысы бойынша суды сақтау үшін, тасқын сулардың алдын алу шараларын ұйымдастыру және су тасқыны қаупін жою мақсатында 2017-2021 жылдарға арналған іс-шаралар жоспарына аудан бойынша Жұлдыз ауылы тұсындағы Кіші Өзенде орналасқан «Жұлдыз плотина» құрылысына қайта құру-техникалық экономикалық негіздемеге немесе оларды қалпына келтіруге жобалық-сметалық құжаттама дайындау үшін биылғы жылы облыстық бюджеттен 6 млн 550 мың теңге қаражат бөлу жоспарланып отыр.
Ресей аумағынан келетін өзен суын ұстау және тасқын суды қауіпсіз өткізу үшін Казталов ауылдық округіне қарасты Сексенбай ауылы тұсынан Кіші Өзеннен су қоймасының құрылысын салу жұмыстары жоспарлануда.
Республикалық бюджеттен қаржыландырылып, аудан аумағы арқылы өтетін
«Киров-Шежін» су арнасы бойынша ІІІ-кезеңдегі жаңа құрылыс және қайта құру жұмыстарына 2 млрд 294 млн теңге қаражат бөлініп, өткен жылы 1 млрд 976 млн теңге көлеміндегі жұмыстардың орындалуы қамтамасыз жасалды.
Аудан аумағын суландыру жүйесіндегі жоғарыда көрсетілген жұмыстар жүйелі түрде жүргізілген жағдайда, табиғи мал азығымен қамту, экологиялық ахуал және ашық су көздерінің тапшылығы жөніңдегі өзекті мәселелердің де шешілуіне септігін тигізбек.
Өздеріңізге белгілі, Мемлекет басшысы Н.Ә. Назарбаев биылғы Жолдауында жаңа әлемге, яғни төртінші өнеркәсіптік революция әлеміне бейімделу мен жетістікке жету үшін 10 міндетті шешуге жұмылуымыз керектігін атап көрсетті. Ауыл шаруашылығына қатысты ҮШІНШІ МІНДЕТТЕ – «Ақылды технологиялар» - агроөнеркәсіп кешенін қарқынды дамыту мүмкіндіктеріне тоқталған.
Алдағы кезеңге басты мақсатымыз – агроөнеркәсіп кешенінің бәсекеге қабілетті дамуын барынша қамтамасыз етіп, алға қойылған міндеттерді жүзеге асыру үшін заман талаптарына сай инновациялық бағытта нақты іс-шараларды жетілдіру болып табылады. Ауылдық елді мекендерде кооперацияны дамыту және ауыл тұрғындарын жұмыспен қамтамасыз ету үшін жеке қосалқы шаруашылықтардың әлеуетін пайдалану бағытындағы жұмыстарды жалғастыра отырып, елімізде жүзеге асырылып жатқан Қазақстан Республикасының агроөнеркәсіптік кешенін дамытудың 2017-2021 жылдарға арналған мемлекеттік бағдарламасының мүмкіндіктерін барынша пайдалана отырып, ауданның ауыл шаруашылығы саласын одан әрі қарай дамыту мақсатында төмендегі міндеттерді шешу бағытында бірлесе жұмыстануымыз қажет. Атап айтқанда:0
Қазақстан Республикасы Ауыл шаруашылығы министрлігінің 2017 жылғы 27 қаңтардағы №30 бұйрығымен бекітілген «Асыл тұқымды мал шаруашылығын дамытуды, мал шаруашылығының өнімділігін және өнім сапасын арттыруды субсидиялау қағидаларына» сәйкес жұмысты толыққанды жүргізу;
Ет өнімдерін өндіруді молайту мақсатында жеке қосалқы шаруашылықтардың әлеуетін пайдалануды арттыра отырып, ірі қара малын бордақылау санын 1500-2000 басқа жеткізу;
Ауылшаруашылық құрылымдарымен бірлесе отырып, сыйымдылығы 100-200 бас ірі қара малын арналған 5 мал бордақылау алаңдарының ашылуын қамтамасыз ету;
Жеке тұрғындарының ауылшаруашылық малдарын делдалсыз етке өткізілуін қамтамасыз ету мақсатында жақын орналасқан екі-үш ауылдық округ тұрғындары үшін 4 мал сою алаңдарын ашу;
Жалпақтал ауылында салынып жатқан мал сою бекетінің жұмысын болашақта етті қайта өңдеу қызметімен кеңейту;
Ауыл тұрғындарын қымыз, шұбатпен, құс және балық енімдерімен қамтамасыз ету мақсатында Талдыапан ауылдық округінде – қымыз өндіру, Ақпәтер ауылдық округінде шұбат дайындау цехтарын, Қошанкөл ауылдық округінде құс шаруашылығын, Жалпақтал, Қароаөзен және Жаңажол ауылдық округтерінде балық шаруашылығын ұйымдастыру;
Мал азығының құнарлылығын арттыру үшін әрбір ауылдық округте көп
жылдық екпелі шөптердің егілуін қамтамасыз ету шараларын алу;
Асыл тұқымды мал өсірумен айналысатын шаруашылықтардың санын арттыра отырып, ғылыми институттармен өз ара байланысын нығайтып, келешегі бар инновациялық жобаларды жүргізу;
Жаңа технологияларды өндіріске енгізу арқылы өсімдік шаруашылығы өнімдерінің көлемі мен сапасын арттыру, картоп, көкөніс және бақша дақылдарын орналастыру жөніндегі индикаторлық көрсеткіштердің орындалуын қамтамасыз ету;
Әрбір ауылдық округте ауылшаруашылық өнімдерін өңдеу цехын ашу бағытында жұмыстану.
Осындай шараларды іске асыру арқылы ауыл шаруашылығы саласының еңбек нәтижесін және экономикалық тиімділігін сипаттайтын еңбек өнімділігін арттыруға ауданның ауылшаруашылық тауар өндірушілері өздерінің қомақты үлестерін қоса беретін болады.


Ауылшаруашылық тауар өндірушілерінің назарына!

Қазақстан Республикасы Премьер-Министрінің орынбасары – Қазақстан Республикасы Ауыл шаруашылығы министрінің 2017 жылғы 27 қаңтардағы №30 бұйрығымен «Асыл тұқымды мал шаруашылығын дамытуды, мал шаруашылығының өнімділігін және өнім сапасын арттыруды субсидиялау қағидалары» бекітіліп, Қазақстан Республикасының Әділет министрлігінде 2017 жылдың 14 желтоқсанында №16092 болып тіркелді.
Мал шаруашылығының әр түрлі бағыты бойынша субсидиялау үшін ауданның ауылшаруашылық тауар өндірушілерінің өтінімдерін қабылдау 2018 жылдың 20 қаңтарынан  бастап жүргізіледі.
Аталған мәселелер бойынша толық ақпаратты Казталов аудандық ауыл шаруашылығы бөлімінен (тел: 8-711-44-32066, 31370) ала аласыз.

Казталов аудандық ауыл шаруашылығы бөлімі

Скачать: БЕКІТІЛГЕН ЕРЕЖЕСІ  

Скачать: Асыл тұқымды мал шаруашылығын дамытуды, мал шаруашылығының өнімділігін және өнім сапасын арттыруды субсидиялау қағидаларын бекіту туралы» Қазақстан Республикасы Премьер-Министрінің орынбасары – Қазақстан Республикасы Ауыл шаруашылығы министрінің 2017 жылғы 27 қаңтардағы № 30 бұйрығына өзгерістер мен толықтырулар енгізу туралы


2017 жылдың 1 қыркүйегіне дейінгі жағдайға аудан бойынша ауыл шаруашылығы саласында 26 заңды тұлға, 590 шаруа қожалықтары тіркелген, ауылшарущылық құрылымдары өткен жылдың сәйкесті кезеңімен салыстырғанда 105,3 пайызға (2016 жылы – 10 заңды тұлға, 585 шаруа қожалығы)  өсіп отыр.
Ағымдағы жылы жалпы көктемгі егіс 419 га алқапта орналастырылды, егіс алқабы өткен жылмен салыстырғанда 100,7%-ға өсті, атап айтқанда картоп және көкөніс-бақша дақылдарының егіс көлемі 169 га, мал азықтық дақылдардың егісі 250 га құрайды, өткен жылы аудан бойынша ауыл шаруашылығы дақылдарының жалпы егіс алқабы - 416 га құрады, соның ішінде картоп – 21 га, көкөніс – 55 га, бақша – 90 га, екпелі шөп – 250 га.  
Аудан шаруашылықтары биылғы жылы 228 мың тонна көлеміндегі табиғи мал азығын дайындау жоспарын 220 мың тоннаға немесе 96,5 пайызға орындады (Бірік а/о – 115,0%, Қараөзен а/о – 106,8%, Ақпәтер а/о – 101,3%, Талдыапан – 100,8%, Жаңажол а/о – 100,0%, Қайыңды а/о – 100,0%). Бүгінгі күні мал азығын дайындау жөніндегі меже биігінен шығу үшін тиісті жұмыстар жалғастырылып жүргізілуде, орақ науқанына 326 трактор, 500 орақ қатысуда.
Есепті мерзімге  шаруашылықтардың барлық санаттарындағы ірі қара малы 81939 басты құрайды, яғни 2016 жылдың сәйкесті мерзімімен салыстырғанда 109,5%, қой мен ешкі – 294305 басқа жетіп, тиісінше 104,5%, жылқы – 23817 бас (112,5%)  және құс бас 15617 бас (100,7%) өсті, түйе – 188 басты құрап, 93,1% кеміді.
2017 жылдың 1 қыркүйегіне дейінгі жағдайға 6325  тонна ет (тірілей салмақта), 17927 тонна сүт, 336 тонна жүн, 2030 мың дана жұмыртқа өндіріліп, өткен жылдың сәйкесті кезеңімен салыстырғанда ауылшаруашылық өнімдерінің барлық түрлері бойынша өсімі қамтамасыз жасалды  (ет – 101,9%, сүт – 101,7%, жүн – 107,4%, жұмыртқа – 101,8%).
Төрт түлік малдан төл алу көрсеткіштері бойынша да өсім бар, атап айтқанда 25818 бас бұзау, 113207 бас қозы, 20799 бас лақ, 6272 құлын, 19 бас бота алынып, өсім тиісінше бұзау – 112,5%, қозы-105,5%, лақ – 103,9%, құлын – 108,9%, бота – 105,6% құрады.     
Агроөнеркәсіптік кешенді дамытуға бағытталған «ҚР агроөнеркәсіптік кешенін дамытудың 2017-2021 жылдарға арналған мемлекеттік бағдарламасын» (әрі қарай - Бағдарлама) жүзеге асыруға ауданның ауылшаруашылық құрылымдары белсене қатысуда.
Бүгінгі күні Бағдарлама игілігін 353 ауылшаруашылық құрылымдары пайдалануда.   Ауданның ауылшаруашылық тауарын өндірушілері өткен жылы бағдарламаның 11 бағыты бойынша 607,1 млн теңге мөлшеріндегі мемлекеттік қолдау қаражатқа ие болды. Биылғы жылы да аудан бойынша 353 шаруашылық 630,5 млн теңге көлемінде мемлекет тарапынан субсидидияланады деп күтілуде. Осы жылдың өткен мерзімі ішінде ауданның ауылшаруашылық құрылымдарының 383,3 млн теңге көлемінде субсидия алу үшін берген өтінімдері бойынша тиісті құжаттары қабылданып, басқармаға жолданды.
Жеке қосалқы шаруашылықтардың әлеуетін пайдалану арқылы ауыл тұрғындары арасында жұмыссыздықты азайту, халықтың әл-ауқатын арттыру мақсатында «Береке» несиелік бағдарламасы аясында ағымдағы жылы мүйізді ірі қара малын бордақылаумен айналысатын 2016 жылы – 2, 2017 жылы - 3 ауылшаруашылық өндірістік кооперативтері (АӨК) жаңадан құрылды. Әр кооператив мүшелерінің саны 20 адамнан асып, селекциялық-түрлендіру және мал бордақылаумен айналысуда. Бүгінгі күнге аудан бойынша есепте тұрған 21 ауылшаруашылық кооперативінің құрамына 1468 тұрғын мүшелікке енген, онда 7236 бас ірі мүйізді қара, соның ішінде 6712 аналық мал тіркелген.
Ағымдағы жылдың өткен кезеңінде «Береке» бағдарламасы шеңберінде «Ауыл шаруашылығын қаржылай қолдау қоры» АҚ БҚО филиалына 51 жеке тұлғаның 177 млн 400 мың теңге несие алуға берген өтінімдері түсті, соның ішінде 48 адамның өтінімдері бойынша 154 млн 400 мың теңге несие берілді, 2 жеке тұлғаның 21 млн 900 мың теңге алу үшін құжаттары мақұлданды, 1 адамның 1 млн  100 мың теңге көлемінде несие алуға берген өтінімдері қаралу сатысында.  
Сонымен қатар,  «Ынтымақ» несиелік бағдарламасы бойынша «Жалпақтал» АӨК (төрағасы – Д.Догоров) - Жалпақтал ауылында, «Шығанақ» АӨК  (төрағасы– Ж.Аксалов) - Казталов ауылында қуаттылығы – тәулігіне 10-15 бас соятын тоңазытқыш көлігімен қамтылатын мал сою пунктін салу үшін  жұмыстануда.
Казталов ауданы облысымыздағы асыл тұқымды мал шаруашылығы бойынша аса бағалы тектік тұқымдық қоры бар, етті бағыттағы «Қазақтың ақбас» және «Герефорд» тұқымды ірі қара, етті-майлы бағыттағы «Еділбай» тұқымды қой, «Көшім» тұқымды жылқысы бар ірі аграрлы өңірлердің бірі болып табылады. Қазіргі уақытта аудан бойынша  асыл тұқымды ірі қара малын өсірумен 9 шаруашылық (1012 бас), қой өсірумен 2 шаруашылық (3451 бас) және жылқы өсірумен 3 шаруашылық (1031 бас) айналысады
Ағымдағы жылы «Сыбаға» , «Алтын асық», «Құлан» бағдарламалары бойынша  12 шаруашылық 136,1 млн теңге несие алуға қол жеткізді, осы қаражатқа 16 бас өндіргіш бұқа, 492  бас ірі қара аналығы, 400 бас саулық, 3 бас айғыр, 80 бас байтал сатып алынды. Бұл бағдарламалар бойынша өткен жылдың сәйкесті мерзіміне 19 шаруашылық несиеге алған 214,1 млн теңге қаражаттарына 29 бас өндіргіш бұқа, 602 бас ірі қара аналығы, 40 бас қошқар, 1643 бас саулық, 18 бас айғыр, 220 бас байтал сатып алған болатын. Көрсеткіштің төмендеу себебі – Бағдарламаны іске жөніндегі іс-шаралар жоспарына сәйкес несиелердің пайыздық мөлшері 6-7 пайыздан 14-19 пайызға дейін өсуіне байланысты агроқұрылымдардың қызығушылығының төмендеуінен болып отыр.
Ауылдық округтерде жеке тұрғындардың ірі қара малын қолдан ұрықтандыру мақсатында 9 қосын жұмыс істейді.   
Биылғы жылы аудан бойынша барлығы 30 трактор, 14 түрлі ауыл шаруашылығы техникалары сатып алынды, соның ішінде шаруа қожалықтары 11 трактор және 10 түрлі ауыл шаруашылығы техникаларын лизинг арқылы алып, өздерінің машина-трактор паркін жаңартуға қол жеткізді.  
Ауыл шаруашылығы саласындағы жаңа бағдарламалар мен технологияларды өндіріске енгізу бағытындағы осындай мақсатты шараларды тиісті деңгейінде жалғастыра беретін болады.